سياسة الخصوصية

مين إحنا

كودرة — شركة برمجيات في القاهرة، مصر. لأي سؤال عن بياناتك، كلّمنا على 01000025860 أو ابعت من نموذج التواصل على الصفحة الرئيسية.

بيانات نموذج التواصل

لما تبعت نموذج التواصل، بنستقبل: الاسم، والبريد الإلكتروني لو كتبته، ورقم الهاتف، وطريقة التواصل المفضّلة، والخدمة المطلوبة، ونص رسالتك.

البيانات دي بتتبعت بالبريد، أول ما تدوس إرسال، لصندوق وارد واحد عندنا. لو الإرسال فشل في اللحظة دي، بتتحفظ في قاعدة بيانات الموقع على Cloudflare لحد ما حد مننا يتعامل معاها بإيده، وبعدها بياناتك بتتمسح منها. مش بتتباع، ومش بتتشارك مع حد لأغراض تسويقية.

في شركتين بتمرّ عليهم في السكة، عشان توصل وبس: Cloudflare اللي مستضيفة الموقع، وResend اللي بتوصّل البريد لصندوقنا.

بنستخدمها لحاجة واحدة: إننا نرد عليك — عادةً خلال 24 ساعة في أيام العمل.

عنوان الـ IP بتاعك بيتحفظ في ذاكرة البرنامج اللي بيستقبل النموذج لعشر دقايق بس، عشان نمنع إرسال النموذج مرات كتير من نفس الجهاز. مش بيتحفظ في أي مكان تاني ولا بيترتبط برسالتك.

الكوكيز

الموقع بيستخدم تلات كوكيز وظيفية بس، ومفيش ولا واحدة منها بتتبّع إعلاني: واحدة بتفتكر اللغة اللي اخترتها، وواحدة للمظهر الفاتح أو الداكن، وواحدة بتحدد لوحة التحكم اللي بتفتحها لو عندك حساب. مفاتيح الجلسة للمشتركين بتتحفظ في التخزين المحلي للمتصفح، مش في كوكي.

مفيش أي أداة تحليلات أو بيكسل إعلاني على الموقع. الموقع بيقيس سرعته هو بس: لما تسيب الصفحة، المتصفح بيبعت الصفحة خدت وقت قد إيه عشان تفتح وتستجيب، ومعاها عنوان الصفحة ولغتها وعرض الشاشة ونوع الاتصال زي ما المتصفح بيقوله — من غير أي حاجة تعرّف بيك أو بجهازك: لا عنوان IP، ولا كوكي، ولا أي معرّف. الأرقام دي بتتحفظ من غير اسم في قاعدة بيانات الموقع.

سياسة أمان المحتوى (CSP) بتاعة الموقع بتمنع أي طلب لخادم تاني، فحتى لو أداة تحليلات اتضافت بالغلط المتصفح هيرفضها. الاستثناء الوحيد تقارير أخطاء الاتصال اللي Cloudflare، مستضيفة الموقع، بتطلب من المتصفح يبعتها لما اتصال يفشل.

بيانات عملاء المنصة

لو مشترك في منصة كودرة، النظام بيحتفظ بالمحادثات وجهات الاتصال والقوالب وحركة المحفظة والفواتير الخاصة بمساحة العمل بتاعتك.

العزل بين العملاء مفروض جوّه قاعدة البيانات نفسها بسياسات Row-Level Security، مش في كود التطبيق — يعني حساب التطبيق مش قادر يقرأ صف مش بتاع مساحة العمل بتاعتك حتى لو حاول.

في أطراف لازم تمر عليها البيانات عشان الخدمة تشتغل: Meta (واتساب) لتسليم الرسائل، ومزوّدو الدفع لشحن المحفظة. كل طرف بياخد اللي محتاجه للغرض ده بس.

حقوقك

تقدر تطلب نسخة من بياناتك، أو تصحيحها، أو حذفها. بالنسبة لعملاء المنصة، تصدير جهات الاتصال بصيغة CSV متاح من اللوحة في أي وقت من غير ما تطلب من حد، ونسخة من المحادثات بتتبعت لك لما تطلبها.

لأي طلب من دول، كلّمنا على 01000025860 أو من نموذج التواصل.

التغييرات على السياسة دي

لو غيّرنا حاجة، هنغيّر تاريخ آخر تحديث فوق. مفيش تغيير بيسري بأثر رجعي على بيانات اتجمعت قبله.