شروط الاستخدام

الاشتراك والإلغاء

الاشتراك شهري وبيتلغي بنهاية الشهر، من غير ارتباط سنوي إجباري. لو في خصم على الدفع السنوي، بيتكتب في عرض السعر.

تقدر تصدّر جهات اتصالك بصيغة CSV من اللوحة في أي وقت قبل الإلغاء؛ وبعد الإلغاء، اطلبها ونبعت لك نسخة من جهات الاتصال والمحادثات.

الاسترداد

أي رسالة تؤكد Meta فشل تسليمها بيترد ثمنها لمحفظتك تلقائيًا — مرة واحدة بالضبط، بقيد دفتري مرجعه معرّف الرسالة نفسها. من غير تذاكر دعم ولا مطالبات.

حدود الاستخدام

سقف طلبات الواجهة البرمجية في الدقيقة بيتحدد في عرض السعر المكتوب. الطلبات فوق السقف بتترفض بكود واضح، ومش بتتحاسب.

الاستخدام المقبول

استخدام المنصة لازم يلتزم بسياسة المراسلة التجارية من واتساب. يعني تحديدًا: مفيش رسائل لأرقام مااختارتش تستقبل منك، ومفيش محتوى مضلل أو ممنوع، والقوالب لازم تعبّر عن اللي بتبعته فعلًا.

لو وصلنا بلاغ موثّق بمخالفة، ممكن نوقف الإرسال على الحساب لحد ما تتحل. بنقول لك السبب مكتوب، ورصيد محفظتك بيفضل ملكك.

حاجات مش تحت سيطرتنا

توثيق النشاط التجاري لدى Meta بياخد الوقت اللي Meta بتاخده، والموافقة على القوالب قرار بتاع Meta مش بتاعنا. مفيش مزوّد يقدر يغيّر ده، واللي بيوعدك بغيره بيبيع لك وهم.

توفّر خدمة واتساب نفسها راجع لـ Meta. اللي بنضمنه هو اللي إحنا مسؤولين عنه: التسليم للـ API، والمحاسبة الصحيحة، والاسترداد الآلي.

مشاريع التطوير

بالنسبة لتطبيقات الموبايل والمواقع والأنظمة المخصّصة: بنتفق على نطاق شغل مكتوب وسعر بالجنيه ومدة تنفيذ قبل ما نبدأ. اللي مش في الورقة مش داخل في السعر، وده بيتقال قبل البداية مش بعدها.

عند التسليم بتاخد الكود والحسابات والتوثيق باسمك، ومعاها فترة متابعة متفق عليها في نفس الورقة.

القانون الواجب التطبيق

الشروط دي بيحكمها قانون جمهورية مصر العربية.

التغييرات

لو غيّرنا الشروط، هيتغيّر تاريخ آخر تحديث فوق، والتغيير بيسري على الاستخدام بعد تاريخه بس.